Ministri i Brendshëm, Xhelal Sveçla ka dhënë detaje për aksionin e arrestimit të serbit gjatë ditës së sotme i cili dyshohet për krime lufte.
Në një postim në Facebook, Sveçla ka thënë se personi në fjalë dyshohet se në cilësinë e gardianit, gjatë luftës, ka ushtruar dhunë e torturë ndaj të burgosurve shqiptarë, shkruan Portali Mergata.
Përveç arrestimit, në banesën e të dyshuarit janë gjetur edhe armë e municione.
Postimi i plotë i Sveçlës:
Pjesëmarrësit në krimet makabre gjatë luftës në Kosovë duhet të mbahen përgjegjës.
Ndaj personit të arrestuar sot në Graçanicë, ka patur një punë të gjatë hetimore, nga e cila janë mbledhur prova të mjaftueshme për ekzistimin e dyshimit për pjesëmarrje në krimet gjatë kohës së luftës.
Në cilësinë e gardianit të burgut në Prishtinë dhe në paralelen e ndarë nga Prishtina konkretisht në burgun e Lipjanit, gjatë asaj periudhe, në mënyrë sistematike, dyshohet se ka ushtruar torturë e dhunë çnjerëzore ndaj të burgosurve shqiptarë, në bashkëpunim dhe me persona të tjerë.
Gjatë kontrolleve të zhvilluara dhe bastisjes në banesën e të dyshuarit ditën e sotme, janë gjetur dhe konfiskuar armë ilegale në posedim të personit.
Përgëzoj Policinë e Kosovës për punën e jashtëzakonshme të zhvilluar gjatë hetimeve si dhe për arrestimin.
Sado që vitet kalojnë, keqtrajtimet dhe torturat e atyre viteve nuk mund të kalojnë pa u ndëshkuar. Përgjegjësit duhet të vihen para drejtësisë. /PortaliMërgata/
