Në Kosovë është bërë normale që të neglizhohen mërgimtarët kosovarë që jetojnë në vendet perëndimore.
Por, ka raste të shumta kur mërgimtarët kanë marrë të gjithë vëmendjen e opinionit por edhe figurave të larta, si ato politike, shkruan Portali Mërgata.
Një rast i tillë kishte ndodhur edhe me mërgimtarin e njohur si Besnik Benz nga Lladova, i cili jeton dhe vepron në Gjenevë të Zvicrës, ku edhe udhëheq biznesin e tij “My Garage Pro Sarl”.
Brenda vitit, Besnik Benz kishte dërguar mijëra euro donacione për fushën e shëndetësisë në Komunën e Gjilanit.
Besnik Benz arriti të marrë kështu edhe vëmendjen e ish-kryetarit të Komunës së Gjilanit, Lutfi Hazirit, i cili e kishte falënderuar publikisht për ndihmën që kishte dhënë, pasi që kjo kishte ndikuar sado pak në përmirësimin e kushteve të cilat nuk ishin aq të mira në atë kohë në Gjilan.
“Falënderoj donatorin Besnik Benz, i cili jeton me familjen e tij në Zvicër. Është një kontigjent i madh që do të ndikoj në përmirësimin e kushteve në Spitalin Regjional dhe në Qendrat e Mjekësisë Familjare në Gjilan. Vlera e këtij kontigjenti është mbi 50 mijë euro dhe është për institucionin i cili mbulon mbi 500 mijë banorë. Në emër të qytetarëve të Gjilanit, e falënderoj donatorin dhe jemi mirënjohës për këtë mbështetje të madhe që e dedikon për regjionin tonë”, kishte thënë Haziri për njërin nga donacionet.
“Vlera e këtij kontigjenti është mbi 20 mijë euro dhe është për institucionin i cili mbulon një numër të konsiderueshëm për të gjithë qytetarët e Gjilanit. Në emër të qytetarëve të Gjilanit, e falënderoj donatorin dhe jemi mirënjohës për këtë mbështetje të madhe që i dedikohet komunës tonë”, kishte deklaruar ish-kryetari Haziri në një donacion tjetër të Besnik Benz.
E çfarë është edhe më shumë për t’u vlerësuar, është modestia e Besnik Benz, i cili asnjëherë nuk ka folur për donacionet e tij për shëndetësinë në Kosovë, duke i qëndruar kështu besnik modestisë së tij që edhe pas arritjeve të shumta në fushën e biznesit, të mos harrojë ndihmat për vendin e tij.
Këto raste janë të rralla, por ja që mërgimtarët tanë dinë të ju habisin.
